Jieštipšomohjelm

Čuávuváá videost (1:20) tun kuulah, maht jieijâs mielâ pyereestvaijeem puáhtá paijeentoollâđ jieštipšomohjelm maŋa.

Tuáivu mield tun lah kavnâm taan ohjelmist tiäđuid, uđđâ jurduid já tyejipiergâsijd, moh išedeh tuu kieđâvuššâđ já haldâšiđ atâštâs. Olssis hiäivulâžžân orroo hárjuttâsâi porgâm kannat juátkiđ puátteevuođâst-uv. Kiddii puátteevuođâst-uv huámášume meid jieijâd aargâhaaldâšmân, já viigâ anneeđ huolâ alnestâd nuuvt pyereest ko máhđulâš.

Suovâ olssâd vuoiŋâstempeeivi, já vuáváá taid veikkâ muuneeld. Vuáváá okkokalenderân muuneeld meid puudâid lihâdem já hitruus toimâm várás.

Kost iše?

Maht mun tooimâm, jis jieštipšomohjelm ij rijttám?

Jis tuu atâštume lassaan ain ovdiist tâi arvâlah, et tot hettee tuu toimâmnaavcâ já eellimtääsi, te uusâ iše iäpádâlhánnáá. Jis tust lii jo tipšomkontakt, te muštâl tubdâmušâinâd jieijâd áámmátlâžân.

Jis tust ij lah tipšomkontakt, te vuáđutiervâsvuotâhuolâttâs lii atâštum ulmui táválávt olmâ tááhu. Vuáđutiervâsvuotâhuolâttâsân kuleh iärásij lasseen tiervâsvuotâsajattuvah, pargotiervâsvuotâhuolâttâsah já priivaat tuáhtársajattuvah. Lasetiäđuid iše ucâmist kávnojeh mielâtiervâsvuotâpalvâlusah-uásist.

Nettiterapia

Jis tun arvâlah, et peessih pyereest aalgân, mut halijdah vievsâb torjuu, te puávtáh savâstâllâđ jieijâd tuáhtáráin nettiterapia máhđulâšvuođâst.

Nettiterapia lii jieijâs tiätumašináin tâi jiermipiergâsáin olášuttum tipšo, mast terapeut tuárju tuu jiečânâs ovdánem. Nettiterapiast kieđâvuššojeh uásild siämmááh teemah ko taan tipšomohjelmist, já tun peesah porgâđ lase hárjuttâsâid.

Tun olášutáh terapia jyehi ohhoost, já ton kukkodâh lii suullân 3–4 mánuppaje. Terapiast tun juáđháh vaigâdvuođâidâd suogârdâllâm já máttááttâlah uđđâ toimâmmaalijd tiätusiskáldâsâi, videoi já hárjuttâsâi vievâst. Jis láá čuosâttum pyereest, te nettiterapiain šaddeh siämmáá šiev puátuseh ko muáđui olášuttum psykoterapiast.

Nettiterapia piäsá táválávt algâttiđ oho keččin tast, ko tuáhtár lii čáállám vuolgâttâs.

Eres ávháliih jieštipšomohjelmeh