Jieštipšomohjelm
2. TYEJIPIERGÂSEH
Lijgemiärálâš atâštâs läävee leđe ceggii já kiäzzud vyevi jurdâččiđ. Talle sáttá nukkosiđ kevttiđ njuásis atâštâshaldâšemvuovvijd.
Vyevih nubástus kuávlun
Šiev uuđâs lii, et jieijâs atâštume puáhtá máttááttâllâđ haldâšiđ. Čovduuh luhostuumân láá tust alnestâd, tondiet ko tun lah jo valmâšin jieijâd mielâ pyeremus äššitobdee.
Čuávuvâžžân tun oopah vuovijd, moiguin lii máhđulâš haldâšiđ lijgemiärálii atâštâs pyerebeht. Uási tain pyehtih leđe tunjin ovdiist uáppáseh, uási vist uđđâseh.
Tuáivu mield tun kaavnah olssâd hiäivulijd vuovijd, maid puávtáh täst ovdâskulij kevttiđ jieijâd aargâst. Jo tot lii merhâšittee, et tun luuvah taam teevstâ. Ađai tun lah aainâs-uv monnii verd orostistám smiettâđ jieijâd tile já tuáivuh nubástus.
Hárjuttâsah láá puoh tehálumos uási jieštipšomohjelmist
Lii tehálâš, et tiäđu luuhâm lasseen tun poorgah meid hárjuttâsâid. Hárjuttâsâi porgâm peht tun muttuuh lohhest aktivlâžžân tahhen. Tánávt tun vááldáh laavhijd jieijâd tile pyeredem kuávlun.
Maht hárjuttâsâid kalga porgâđ?
Motomeh hárjuttâsah väldih eenâb ääigi ko nubeh. Tehálâš lii kuittâg tot, et tun juáđháh hárjuttâsâiguin, veikkâ tot oroččij-uv hastâleijen. Motomijd hárjuttâsâid lii tehálâš kiärduđ tuárvi maŋgii, já talle tuu olášuttem nubástusâin šaddeh kileluboh.
Hárjuttâsâid, maid tun anah eromâš pyerrin, kannat väldiđ muušton já maccâđ toid kuhheeb ääigi siste.
Čuávuváá videost (1:21) tun finniih oonâid jieštipšomohjelm hárjuttâsâi porgâmân. Siämmást tun kuulah, et mondiet hárjuttâlmân kannat čonâdâttâđ.
Addel ääigi nubástusân
Motivaatio aašij muttemân mulsâšud. Meid vyeimih nubástus olášutmân sättih motomin leđe eenâb, motomin vist ucceeb. Mušte, et taat mulsâšuddâm lii luándulâš.
Soovâ kuittâg jieijâinâd: keččâl taam jieštipšom ravvuid, já árvuštâl eskin maŋeláá tom, et mon ávháliih toh lijjii.
Tun finniih taan uásist tyejipiergâsijd toimâmnaavcâ macâttem já jurdâččemvyevi uđâdem várás. Poorgâ pargoid tađe mield, et moh pargoid oroh olssâd taarbâšlâžžân. Mušte kuldâliđ jieijâd vyeimivaarijd.