Iešdikšunprográmma

Čuovvovaš filmmas (1:20) gulat, mot iežat miela buresveadjima sáhttá doalahit iešdikšunprográmma maŋŋá.

Sávvamis leat gávdnan dán prográmmas dieđuid, ođđa ideaid ja bargoreaidduid, mat veahkehit du gieđahallat ja hálddašit áŧestusa. Alccesat vuogas hárjehusaid gánnáha joatkit boahtteáiggisge. Gidde dás duohkoge fuomášumi maiddái iežat árgabeaivvi hálddašeapmái, ja fikka atnit ávvira alddát buoremus vejolaš vugiin.

Atte alccesat lobi doallat vuoiŋŋastanbeivviid ja pláne daid vaikko ovddalgihtii. Pláne vahkkokaleandarii ovddalgihtii maiddái lihkadanbottuid ja vuogas doaimmaid.

Gos oaččun veahki?

Mot doaimman, jus iešdikšunprográmma ii lean doarvái?

Jus du áŧestus beare čavgana dahje vásihat, ahte dat hehtte du doaibmanávccaid ja eallinkvalitehta, oza veahki eahpitkeahttá. Jus dus lea juo dikšunkontákta, muital dovdamušainat iežat ámmátolbmui.

Jus dus ii leat dikšunkontákta, áŧestusain rievttes oassebealli lea dávjjimusat vuođđodearvvašvuođafuolahus. Vuođđodearvvašvuođafuolahussii gullet earret eará dearvvašvuođaguovddážat, bargodearvvašvuođafuolahusat ja priváhtta doavtterstašuvnnat. Lassidieđut veahki ohcamis gávdnojit mielladearvvašvuođabálvalusat-oasis.

Neahttaterapiija

Jus vásihat, ahte besset bures johtui, muhto háliidat nannosabbo doarjaga, sáhtát ságastallat doaktáriinnát vejolašvuođas oažžut neahttaterapiija.

Neahttaterapiija lea dikšu, mii dahkkojuvvo iežas dihtoriin dahje fiehttorusttegiin, ja mas terapevta doarju du iehčanas ovdáneami. Neahttaterapiijas gieđahallojuvvojit muhtumassii seammá temát go dán dikšunprográmmas ja beasat bargat lasi hárjehusaid.

Terapiija lea vahkkosaččat, ja dat bistá sullii 3–4 mánotbaji. Terapiijas joatkkát váttisvuođaidat suokkardallama ja oahpahalat ođđa doaibmamálliid diehtosisdoaluid, filmmaid ja hárjehusaid bokte. Neahttaterapiijain leat juksan seammá buorre bohtosiid dalle go dat leat čujuhuvvon riekta, go njunnálagaid ollašuhttojuvvon psykoterapiijas.

Neahttaterapiija beassá dávjjimusat álggahit vahku siste dan maŋŋá, go doavttir lea čállán vuolggahusa.

Eará ávkkálaš iešdikšunprográmmat