Iešdikšunprográmma
Mii áŧestus lea?
Govttolaš áŧestusa dovddut gullet eallimii. Dat leat ealačoahki vuohki muitalit vejolaš váras ja doalahit gearggusvuođa doaibmat.
Ná áŧestus veahkeha garvit váralaš diliid ja dárbbu mielde doaibmat dáin diliin johtilit ja beaktilit.
Áŧestusa ávkkit
Muhtumin áŧestus veahkeha áddet, ahte maid nu ferte bargat eará láhkai. Dát sáhttá dagahit buresveadjima buorideaddji eallindáhpenuppástusaid. Jus ovdamearkka dihtii árgga hohpolašvuohta áŧesta, de sáhttá veahkehit, jus geahpeda dáhpáhusaid ja plánaid.
Vahátlaš áŧestus
Muhtumin áŧestus rievdá govttohis fámolažžan, hálddašmeahttumin dahje guhkesáigásažžan. Áŧestus ii stivrege doaibmat buoret čovdosiid guvlui, muhto hehtte beaivválaš eallima. Dalle áŧestus lea vahátlaš iige suodjaleaddji dovdu.
Jurdagat, dovddut ja doaibman leat oppa áigge oktavuođas nuppiidasaset.
Go rievdadat iežat doaibmavugiid, sáhtát váikkuhit iežat jurdagiidda ja dovdduide. Seamma go rievdadat iežat jurddašanvugiid, sáhtát váikkuhit iežat dovdduide ja rievdadit du láhttema.
Áŧestusa vásihan olbmot muitalit filmmas (2:29), makkár dovdamušaid ja jurdagiid áŧestus soaitá bohciidahttit sis.
Jurdagat, dovddut ja doaibman
Árgabeaivvi dilit bohciidahttet iešguđetlágan dovdduid. Dovddut bohciidit nu johtilit ja automáhtalaččat, ahte sáhttá gáddit dat leat njuolga čuovvumuš olgguldas dáhpáhusain. Ná ii goittotge leat, muhto jurdagat ja dulkojumit dilis váikkuhit dasa, makkár dovddut bohciidit.
Iežas jáhkuid váikkuhus
Olmmoš, guhte jurddaša ovdal dehálaš dáhpáhusa "basttán ovdanbuktit iežan ášši jáhkehahtti láhkai", ii jáhkkimis vásit liiggás jierástuddama ja áŧestusa. Goruda dovdamušat eai šatta menddo garasin, vaikko jiarástuttašiige.
Dan sadjái olbmos, guhte jurddaša “vuoi gáfat, buohkat várra jurddašit mun lean čuorbi”, de sáhttet streassa- ja áŧestusdássi loktanit sakka. Dát sáhttá dagahit ovdamearkka dihte jođálmahttit váibmoravkima, bivastuvvama, doarggisteami ja čoavječárvvohagaid.
Fuomáš:
Iešguđetlágan jurdagat ja dovddut bidjet maid láhttet seammá dilis sierra láhkai: mađe sihkkarabbon don vásihat iežat, dađi sihkkarabbot don jáhkkimis doaimmat.
Dán oktavuođa diđošteapmi lea vuosttamuš lávki nuppástussii!
Jurdda
Dovdu
Goruda dovdamušat
Doaibman
Hárjehus: Dovdá dovdduid gorudisttát
Manin?
Áiccat, gokko buohta gorudis áŧestus dovdo.
Go leat áican, gokko buohta gorudis áŧestus dovdo, sáhtát hárjehallat gieđahallat iežat goruda dovdamuša ja dan bokte du áŧestusa.
Ovdamearkka dihtii, jus
- áŧestus dagaha deahkkegealddu->sáhtát álkidahttit iežat dili bargamiin lotkkiidanhárjehusaid
- áŧestus váttásmahttá vuoigŋama->sáhtát álkidahttit du dili bargamiin vuoigŋanhárjehusaid
Mot?
Čále ja govvit nu dárkilit go vejolaš, gokko buohta gorudisttát dovddat iešguđetlágan dovdduid.
Govvit maiddái dan, jus dovdu vuolgá muhtin fysalaš sajis ja nohká nubbái. Ná sáhttá leat ovdamearkka dihte dalle, jus dovdu álgá hárduin ja nohká maŋŋeoaivái.
Sáhtát ávkkástallat pdf-mildosa gorutgovain dahje čállit fuomášumiidat vulobeallái.
Gokko buohta gorudisttát dovddut dovdojit?
Muitte
Don sáhtát rievdadit iežat doaibmavugiid ja jurddašanmálliid!
Dasa oaččut bargoreaidduid dán iešdikšunprográmmas.