Jiõččhåidd-programm
Miõllpueʹr lââʹzztummuž aʹrǧǧe
Oummuin liâ jeäʹrdõõzz streʹssǩiõrddâmvuõđâst, da lij šiõǥǥ mättjed tobdsted jiijjâs raaj. Jos vuâmmšak, što âânak mååžnteʹmes jiânnai ääiʹj viõkkväärid viikki aaʹššid, kaʹnnat tuʹst taʹrǩstõõllâd aarǥ da ǩiʹddjed vuâmmšõõzz ääiʹjââʹnnem tääʹsstiõddu.
Jõs takai jieʹllmest ij leäkku nokk äiʹǧǧ vuâŋŋmõʹšše da luännʼjummša, tâʹl vueiʹtte seuʹrrjõssân leeʹd ouddmiârkkân
- miõl luâšttmõõžž, kõõđõõttmõõžž da viõssmõõžž
- mošttvaiggâdvuõđ da čiŋlmõõvvâmoodd huânnʼnummuž
- mååžnteʹmes peʹcclõõvvmõõžž leʹbe tååʹsǩ
- altteemoodd huânnʼnummuž
- miõl ǩieʹssem vääʹn ääiʹjben miõllsiʹžžen õnnum aaʹššid
Mii põhtt tuʹnne räämm?
Lij samai oummust ǩidd, koʹst ǩii-i naaudaš. Lij samai vääžnai, što teâđak, måkam ääʹšš põʹhtte räämm tuʹnne. Tõk vueiʹtte leeʹd ouddmiârkkân
- šiõǥǥ ǩiiʹrji lookkmõš
- jieʹllikaarti ǩiõččmõš
- organisaatiotåimmjummša vuässõõttmõš
- taaurõõžži vuäinnmõš
Smiõtt še, lââʹzzte-a jiijjad vaalšem ääʹšš pueʹrrjieʹllem še kuʹǩes äiʹǧǧkõõskâst. Levvjeen vuäitak leeʹd lääʹđes mõõnnâd tueʹjjeed hääitlaž da puäst räʹtǩǩummšid. Ouddmiârkkân miõlpueʹreem poorrmõš, alkohool, vaarrspeâllmõš leʹbe neeʹttest suʹrffjummuš vueiʹtte poddsânji hiâlpted åårrmõõžž, leša kuʹǩes äiʹǧǧkõõskâst leeʹd häittan.
Inspirõsttu järrsi ǩiõččlâsttmõõžžin
Videost (2:45) tååʹsǩ tobddâm oummu mainste ouddmiârkkân aaʹššin da tuejjummšin, koin sij naaudše da vuäǯǯa viõǥǥ aarǥ kõõskâst.
Õhtt viŋkk lij še plaaneed miõllsaž âsttääiʹj raajjmõš ooudbeäʹlnn, što tõt pueʹrben šõõddči rajjum.
Harjjtõs: Miõllpueʹrräiʹtt - Måkam aaʹššin naaudšak?
Mõʹnt?
Miõllpueʹrr vieʹǩǩat vueiʹtted jieʹllem õõlǥtummšid.
Tän harjjtõõzzâst mättjak tobdsted aaʹššid, kook lââʹzzte miõllpueʹr aʹrǧǧe.
Mäʹhtt?
- Raaj listt aaʹššin, koid âânak pueʹrren. Mušttâl liist tueʹjjeen aaʹššid, kook liâ põhttam tuʹnne miõllpuârõõzz ääiʹjab. Jeäʹl õõlǥât, što tõin õõlǥči puʹhtted samai ååʹn miõllpueʹr. Vuäitak še smiõttâd samai ođđ tååimaid. Ǩiččlõõđ smiõttâd vueiʹtlva mäŋgg uuʹcces da konkreettlaž ääʹšš.
- Piij liist kuâsttjemnalla håʹt jiõŋŋškaapp uʹhsse.
Miõllsaž aaʹšši kaunnmõš lij hiâlpab tâʹl ǥu leäk tååđvaž.
Miõllpueʹrräiʹttan
Muuʹšt
Vuäitak vaaikted jiijjad pueʹrrjiellma aivv takai juõʹǩǩpeivvsaž aaʹššin.
Aarǥâst kaʹnnat ââʹnned seʹst aaʹššid, kook põʹhtte miõllpueʹr. Tõt vieʹǩǩat vueiʹtted jieʹllem õõlǥtummšid.