Jiõččhåidd-programm

Vuâmmšõõzz ǩiʹddjet ǩiõldlaid aaʹššid da miõttlõs beäʹl väjldââʹttet.

Ouddmiârkk: "Vuõǯǯum ouddnemsaǥstõõllmõõžžâst tuâjjlažjååʹđteeʹjest jiânnai ǩeäitaid da õõut siõmmna negatiivlaž kommeeʹnt. Luämmeem ǩeäitaid obbnes, da mooštam ååʹn pâi tõn õõut negatiivlaž kommeeʹnt."

Ääʹšš vueiʹnet ruõbddǩiiʹjji pääiʹǩ leʹbe juʹn-a samai hueʹnes leʹbe samai pueʹrren.

Ouddmiârkk: "Leäm hueʹnes da kuddtem. Jeärraz oʹnnste håʹt koʹst, koozz äʹlǧǧe."

Oʹdinakaišõddmõõžžin tueʹjjeet leiʹǧǧtäujjummšid.

Ouddmiârkk: "Lõõstâst ǩeeʹrjteš škooulmääʹtǩest tääʹvtum päärnast. Põõlam, što pärnnan tääʹvtet, jõs jiõm viiǥǥ suu aautin škoouʹle."

Ooumaž åskk tieʹttem, mâid jeärraz joʹrdde da tåʹbdde.

Ouddmiârkk: "Ǥu ǩii-ne ǩeäčč muu kuuʹǩǩ, joordam, što son ärvstââll muu."

Pukin hueʹnmõõzz vueiʹtlva vaajtõsmääin juuʹrdet šõddâm.

Ouddmiârkk: "Vueiʹvv lij čuâccam âʹlddpeeiʹvi poodd. Tät lij miârkk vuõivâšnšâddõõzzâst leʹbe koʹst-ne jeeʹres loʹsses puâccmõõžžâst."

Vaiggâdvuõđi vuäinnmõš tuõttla šõõrben.

Ouddmiârkk: "Jiõm oʹnnstam teeʹntest, nääiʹt jiõm leäkku suåppi tääzz škooultemprograʹmme. Joordam, što sueʹrǧǧ še lij muʹnne puäst, ǥu jiõm vueiʹt piʹrǧǧeed ni määttain."

Nuuʹbbi oummui reagâsttmõõžžid juuʹrdet tillʼlõõvvâm pâi jiõccsan. Seämmavuâra muu veʹrddeet nuuʹbbid.

Ouddmiârkk: "Jõs tuâjjpääiʹǩest ǩii-ne kommeentâstt takainalla tiimi tuâjjviõkkšõsvuõđ lueʹšttem, joordam kommeeʹnt kuõskkâm tåʹlǩ muu. Joordam nääiʹt, håʹt-i teâđam, što tueʹjjääm tuâj reʹttvânji."

Jiijjâs da nuuʹbbi jälstõõttmõõžž ärvvtõõleen ââʹnet määiʹnteʹmes da mottjeteʹmes vuâkkõõzzid.

Ouddmiârkk: "Smiõttam täujja, mäʹhtt kååʹtt-ne äʹšš õõlǥči tueʹjjeed. Joordam, što muʹst õõlǥči leeʹd virkkâd da piʹrǧǧeed pukin vuõʹjjin. Joordam še, što muʹst õõlǥči leeʹd tääʹrǩab."

Âʹǩǩed šõddmõõžžin ååskat åårram täujja jiijjâs määin.

Ouddmiârkk: "Pärnnan jueʹlǧǧ morddji šelljsiõrin. Jõs leʹččim raʹddjõõlab puäʹres, leʹjjem pâʹstted cõggâd vueʹjj. Jueʹlj morddjummuš lij nääiʹt muu mäinnan."

Šiõǥǥ aaʹšši juurdčet šõddâm tuurâst, leʹbe tõid juurdčet åårram jeärrsi šõõddeem. Jiijjâs paddmõõžžin jeäʹt vueiʹn leämmaž vaaiktõõzz positiivlaž lopp-puättmõõžžid.

Ouddmiârkk: ”Ǥu vuäǯǯam tuâjast positiivlaž maacctõõzz, joordam, što tõt leäi tåʹlǩ sättʼtõk. Leäm vuäǯǯam jiânnai vieʹǩǩ tuâjjtaaurõõžžâst, nääiʹt tuâjjlažjååʹđteeʹjest kuulči vuõiʹǧǧest säärneeʹl späʹssbõõššâd suu. Možat tuâjjlažjååʹđteeʹj smeʹllkõõʹtti muu pâi žaaʹlest."