Jiõččhåidd-programm
Mõõk liâ loʹssesmiõllsažvuõđ oudldõõzz?
Oʹdinak oudldõs ij veâl miârkât loʹssesmiõllsažvuõđ. Loʹssesmiõllsažvuõđin miârktet puõʒʒâlm, koʹst jeeʹresnallšem oudldõõzz očndâʹtte puätkkneǩani kuuʹǩǩab ääiʹj.
Loʹssesmiõllsažvuõttoudldõõzzid ij pâi leäkku hiâlpp toobdsted jiõčč. Jõs âʹlddooumaž piâkkââtt vueiʹttmõõžžstad, kâʹl suu kaʹnnat kuvddled.
Puõʹtti videost (1:42) pâʹjjdåhttar Suoma Saarni maainast, kuäʹss miõlltoobd luâšttmõʹšše kaʹnnat reagâʹstted da ooccâd vieʹǩǩ.
Loʹssesmiõllsažvuõʹtte tyypplaž oudldõõzz
Miõʹlle da jiõččtobddu õhttneei oudldõõzz
- kuuʹǩǩ piʹštti peʹcclaž miõll
- kõõđõõttâmlääʹđesvuõtt
- Taaujâs jääʹmmʼma õhttneei jurddi
- jiõččnaʹddjõõzz occnummuš
- jiõččviârtõõzzi lâssnummuš
- tuʹmmstõktuâj vaiggâdvuõtt
- miõl ǩeässmõõžž puuttmõš nåkam aaʹššid, kook ooudbeäʹlnn puuʹtʼte miõllpuârõõzz
- čiŋlmõõvvâmvaiggâdvuõđ
Fyyslaž oudldõõzz
- levvjummuš da viõssmõš
- tåimmamoodd occnummuš da ij vuäǯǯ äigga ni mâid
- meäʹrteʹmes fyyslaž oudldõõzz (vueiʹvvkõpp, pâʹnnvââʹjj, teäʹǩǩ-kõõv)
- poorrâmhaal muttâz
- vueʹđđemheâmmeem (leiʹǧǧvuâđđmõš, tueʹlesiin kåccstõõllmõš da vaiggâdvuõtt vuäđđjed oʹđđest)
Mäʹhtt loʹssesmiõllsažvuõtt kuâsttai aarǥâst?
Loʹssesmiõllsažvuõtt ouddan siõmmnai siõmmnai.
Vuõssmõs miârkid vuäitt vuâmmšed tõʹst, što jiijjâs aarǥ- da jieʹllemvaaldšemtoobd äʹlǧǧe rââššad. Jieʹllemvaaldšemtobddi maannmõš kuâsttai vuõssmõssân põrttjieʹllmest. Kärldõõǥǥ kuâđđje tiʹsǩǩeekani da põrtt lij čiistǩani, di ij nueʹsǩeʹld jälstummšest vueiʹt teänab leeʹd piâkkõõttâm.
Loʹssesmiõllsažvuõđ aalǥâst tuâjj- da tåimmamodd vuäitt põõrt åålǥbeäʹlnn čuäjtõõttâd še kuuʹǩǩ pueʹrren, håʹt-i loʹssesmiõllsažvuõđ miârk leʹčči muđoi čiõlggsânji vuâmmšemnalla.
Lij šiõǥǥ ooccâd vieʹǩǩ da kässjõõttâd aaʹššid juʹn vueiʹtlva ääiʹjeld, što loʹssesmiõllsažvuõtt ij piâzzče ouddned samai čuuʹt.
Aarǥ pueʹrrjieʹllem vuâđ raajsmâʹvve määŋgast ääʹššest
- Riʹjttjeei vuâŋŋmõõžž da aktiivlažvuõđ tääʹssteädd
- liikkummuš
- tiõrvvsallaš poorrmõš
- peäʹnci uuʹccben âânnmõš
- miõllsiʹžžen õnnum leʹbe oʹnnstummuž jeäʹlstõõzzid puuʹtʼteei tuejjummuž riʹjttjeei mieʹrr
Måkkmen loʹssesmiõllsažvuõtt tåbddai?
Puõʹtti videost (2:49) loʹssesmiõllsažvuõđ puõccâm oummu mainste, måkam oudldõõzzid loʹssesmiõllsažvuõtt šõõddad seeʹst.
Harjjtõs: Jiijjan oudldõõzz
Täävtõs
Toobdstak, måkam oudldõõzz loʹssesmiõllsažvuõʹtte koʹlle.
Vuäppõs
Loʹssesmiõllsažvuõtt lij puõʒʒâlm, koʹst jeeʹresnallšem oudldõõzz očndâʹtte seämma-äiggsânji kuuʹǩǩab ääiʹj.
Tuʹtǩǩed ooudbeäʹlnn åårrai liist oudldõõzzin. Listtâd jiijjad oudldõõzzad vueiʹtlva tääʹrǩeld.
Muuʹšt
Loʹssesmiõllsažvuõtt lij õhtt aalmjallaž miõltiõrvâsvuõđ rõttjõõzzin.
Ääiʹjeld aʹlǧǧi tobdstummuš da hååid alttummuš lij vääžnai.