Jieštipšomohjelm

​Tuáivu mield tun finnejih ávhálijd tiäđuid já uđđâ jurduid sehe tyejipiergâsijd šlundevuođâ vyeittimân. Kiddii puátteevuođâst-uv huámášume jieijâd aargâ haaldâšmân já viigâ anneeđ huolâ alnestâd nuuvt pyereest ko máhđulâš. Mušte meid palhâšiđ jieijâd.

Kannat juátkiđ toimâmpeivikirje toollâm, vâi oopah aiccâđ, et maht jieškote-uv tahheeh vaigutteh tuu mielâtilán.

Suovâ olssâd vuoiŋâstempeeivijd, já vuáváá taid veikkâ muuneeld. Vuáváá okkokalenderân muuneeld meid puudâid lihâdem já tuđâtteijee toimâm várás.

Čuávuváá videost (1:20) tun kuulah lase oonâid toos, et maht jieijâs mielâ pyereestvaijeem puáhtá paijeentoollâđ jieštipšomohjelm maŋa.

Kost iše?

Maht mun tooimâm, jis jieštipšomohjelm ij rijttám?

Jis tuu šlundevuotâ lassaan ain ovdiist tâi tun arvâlah, et tot hettee tuu toimâmnaavcâ já eellimtääsi, te uusâ iše iäpádâlhánnáá.

Jis tust lii jo tipšomkontakt, te muštâl tubdâmušâinâd jieijâd áámmátlâžân. Jis tust ij lah tipšomkontakt, te vuáđutiervâsvuotâhuolâttâs lii atâštum ulmui táválávt olmâ tááhu. Vuáđutiervâsvuotâhuolâttâsân kuleh tiervâsvuotâsajattuvah, pargotiervâsvuotâhuolâttâsah já priivaat tuáhtársajattuvah.

Nettiterapia

Jis tun arvâlah, et peessih pyereest aalgân, mut halijdah vievsâb torjuu, te puávtáh savâstâllâđ jieijâd tuáhtáráin nettiterapia máhđulâšvuođâst.

Nettiterapia lii jieijâs tiätumašináin tâi jiermipiergâsáin olášuttum tipšo, mast terapeut tuárju tuu jiečânâs ovdánem. Nettiterapiast kieđâvuššojeh uásild siämmááh teemah ko taan tipšomohjelmist, já tun peesah porgâđ lase hárjuttâsâid.

Tun olášutáh terapia jyehi ohhoost, já ton kukkodâh lii suullân 3–4 mánuppaje. Terapiast tun juáđháh vaigâdvuođâidâd suogârdâllâm já máttááttâlah uđđâ toimâmmaalijd tiätusiskáldâsâi, videoi já hárjuttâsâi vievâst.

Jis láá čuosâttum pyereest, te nettiterapiain šaddeh siämmáá šiev puátuseh ko muáđui olášuttum psykoterapiast.

Nettiterapia piäsá táválávt algâttiđ oho keččin tast, ko tuáhtár lii čáállám vuolgâttâs.