Jieštipšomohjelm
6. Oopâ vuástáväldiđ jurduid já tobdoid
Ulmuin lii távjá ibárdâs, et jieijâs juurdâ tâi tobdo lii iävtuttes tuotâäšši. Tuotâvuođâst juurdâ lii tuše juurdâ já tobdo lii tuše tobdo. Toh maneh lappâd.
Jurduuh já tobdoh mulsâšudeh
Tyemmejeijee jurdâččem tuše lasseet nievris mielâ. Motomin iđedist spejâlist kejâdijn mist lii juurdâ, et mij lep muččâdeh. Motomin vist lii juurdâ, et mij lep fasteh. Kuábáškin ij kuittâg lah tađe eenâb olmâ fakta, pic tuše lappâd mannee juurdâ, moos meid mielâtileh vaigutteh.
Tobdotileh-uv mulsâšudeh: motomin mij lep soroliih, motomin iloliih. Mihheen ij lah pisovâš.
Ko tun huámášah, et lááitáh jieijâd mastnii, te merkkuu tom muušton. Vääldi tom tuše huámášumán. Tun puávtáh veikkâ kijtteđ sarkastlávt jieijâd mielâ taan läittee jurdust já viggâđ lyeštiđ tast.
Jurduuh já tobdoh láá vuáimáliih, mut toi mield ij lah pággu toimâđ. Tipte taid puáttiđ tego meerâ pááruid tâi alme poolvâid. Nubeh pááruh láá stuárráábeh, nubeh ucebeh. Nubeh poolvah joteh hitásubbooht, nubeh vist jotelubbooht, mut toh iä ooroost.
Hárjuttâs: Muu jieččân tyemmejeijee jurduuh
Ulme
Tun oopah väldiđ negativlijd jurduid huámášumán, čäälliđ taid pajas já lyeštiđ tain. Tun addiih, et veikkâ jurduuh já tobdoh láá vuáimáliih, te toi mield ij lah pággu toimâđ.
Raavâ
Čääli pajas, et magareh tyemmejeijee jurduuh tust láá alnestâd tâi iärásijn.
Smietâ jyehi čallum jurduu peht:
- Lii-uv taan tyemmejeijee jurdust ävkki?
- Jis ij lah, te puávtám-uv mun viggâđ peessâđ tast luovâs?