Jieštipšomohjelm

2. TYEJIPIERGÂSEH

Taan uásist tun oopah jieškote-uvlágán vuovijd, moiguin tun puávtáh haldâšiđ jieijâd šlundevuođâ tavdâmeerhâid já ovdediđ jieijâd pyereestvaijeem.

Šlundom ulmui lii távjá vaigâd uáiniđ aašijd onnáá peeivist olgoláá já motivaatio jieijâs tipšomân sáttá leđe lappâsist. Taan uásist tun finniih torjuu sehe tiäđuid tast, et maht puávtáh ovdániđ.

Vyevih nubástus kuávlun

Šiev uuđâs lii, et jieijâs šlundevuođâ tavdâmeerhâid puáhtá máttááttâllâđ haldâšiđ. Čovduuh luhostuumân láá tust alnestâd, tondiet ko tun lah jieijâd mielâ pyeremus äššitobdee.

Čuávuvâžžân tun oopah vuovijd, moiguin lii máhđulâš haldâšiđ šlundevuođâ pyerebeht. Uási tain sättih leđe tunjin jo ovdiist uáppáseh, uási vist uđđâseh.

Tuáivu mield tun kaavnah olssâd hiäivulijd vuovijd, maid puávtáh täst ovdâskulij kevttiđ jieijâd aargâst. Jo tot lii merhâšittee, et tun luuvah taam teevstâ. Tun lah čielgâsávt orostâm smiettâđ jieijâd tile já tuáivuh nubástus.

Addel ääigi nubástusân

Motivaatio aašij muttemân mulsâšud. Meid vyeimih nubástus olášutmân sättih motomin leđe eenâb, motomin vist ucceeb. Mušte, et taat mulsâšuddâm lii luándulâš.

Soovâ kuittâg jiejâinâd: keččâl taam jieštipšom ravvuid, já árvuštâl eskin maŋeláá tom, et mon ávháliih toh lijjii.

Tun finniih taan uásist tyejipiergâsijd toimâmnaavcâ macâttem já jurdâččemvyevi uđâdem várás. Poorgâ hárjuttâsâid tađe mield, et moh tain oroh olssâd taarbâšlâžžân. Mušte kuldâliđ jieijâd vyeimivaarijd.

Hárjuttâsah láá puoh tehálumos uási jieštipšomohjelmist

Hárjuttâsah láá ohjelm vááimus. Toi peht tun peesah karttiđ já smiettâđ čuávdusijd jieijâd tilán.

Lii tehálâš, et tiäđu luuhâm lasseen tun poorgah meid hárjuttâsâid. Hárjuttâsâi porgâm peht tun muttuuh lohhest aktivlâžžân tahhen. Tánávt tun vááldáh laavhijd jieijâd tile pyeredem kuávlun.

Maht hárjuttâsâid kalga porgâđ?

Motomeh hárjuttâsah väldih eenâb ääigi ko nubeh. Tehálâš lii kuittâg tot, et tun juáđháh hárjuttâsâiguin, veikkâ tot oroččij-uv hastâleijen.

Motomijd hárjuttâsâid lii tehálâš kiärduđ tuárvi maŋgii, vâi tuu olášuttem nubástusâin šaddeh kileluboh.

Hárjuttâsâid, maid tun anah eromâš pyerrin, kannat väldiđ muušton já maccâđ toid kuhheeb ääigi siste.

Čuávuváá videost (1:21) tun finniih oonâid jieštipšomohjelm hárjuttâsâi porgâm várás. Siämmást tun kuulah, et mondiet hárjuttâlmân kannat čonâsiđ.

Taan ubâlâšvuođâst

Täst láá puoh taan ubâlâšvuođâ siijđoh