Iešdikšunprográmma

2. BARGOREAIDDUT

Dán oasis oahpat iešguđetlágan vugiid, maiguin sáhtát hálddašit iežat deprešuvnna symptomaid ja ovddidit iežat buresveadjima.

Jus lea deprešuvdna, lea váttis oaidnit áššiid otná beaivvi guhkkelabbui ja motivašuvdna iežas dikšumii soaitá leat jávkosis. Dán oasis oaččut doarjaga ja dieđuid das, mot sáhtát ovdánit.

Vuogit nuppástuvvama guvlui

Buorre ođas lea, ahte iežas deprešuvnna symptomaid sáhttá oahpahallat hálddašit. Dus alddát leat čoavdagat lihkostuvvamii, daningo don leat iežat mielas buoremus áššedovdi.

Čuovvovaččat oahpat vugiid, maiguin don sáhtát oažžut deprešuvnna symptomaid buorebut hálddašeapmái. Muhtimat dain sáhttet leat dutnje juo oahppásat, muhtimat fas ođđasat.

Sávvamis gávnnat alccesat heivvolaš vugiid, maid sáhtát árgabeaivvistat ávkkástallat. Juo dat lea mearkkašahtti, ahte logat dán teavstta. Don leat čielgasit bisánat smiehttat iežat dili ja sávat nuppástusa.

Atte nuppástussii áiggi

Motivašuvdna áššiid nuppástuhttimii molsašuddá. Maiddái fámut nuppástussii soitet gaskkohagaid leat eanet, muhtumin fas uhcit. Muitte, ahte dát molsašuddan lea lunddolaš.

Bargga liikká soahpamuša iežainat: geahččal dán iešdikšuma rávvagiid, ja árvvoštala easka maŋŋelabbos daid ávkkálašvuođa.

Oaččut dán oasis bargoreaidduid doaibmanávccaid máhcaheapmái ja jurddašanvuogi ođasmahttimii. Bargga hárjehusaid dan mielde, mat dain orrot alccesat dárbbašlaččat. Muitte bargat iežat fámuid mielde.

Hárjehusat leat dehálaš oassi iešdikšunprográmmas

Hárjehusat leat prográmma váimmus. Daid bokte beasat kártet ja smiehttat čovdosiid iežat dillái.

Lea dehálaš, ahte dieđu lohkama lassin barggat maid hárjehusaid. Hárjehusaid bargama bokte nuppástuvat lohkkis aktiivvalaš dahkkin. Ná lávket iežat dili buorideapmái.

Mot hárjehusat dahkkojuvvojit?

Muhtin hárjehusat váldet eanet áiggi go nuppit. Lea goittotge dehálaš, ahte joatkkát hárjehusaiguin, vaikke dat orošiige hástaleaddji.

Muhtin hárjehusaid lea dehálaš geardduhit doarvái máŋgii, ja dalle du dahkan nuppástusat bistet buorebut.

Hárjehusat, maid vásihat erenomáš buorrin, gánnáha merket muitui ja máhccat daidda gillilit.

Čuovvovaš filmmas (1:21) oaččut tipssaid iešdikšunprográmma hárjehusaid bargamii. Seammás gulat, manin hárjehallamii gánnáha čatnasit.

Dán ollisvuođas

Dás leat buot dán ollisvuođa siiddut