Iešdikšunprográmma

Deprešuvdnii laktásit dávjá oađđinhehttehusat. Oađđin sáhttá leat boatkkalaš. Olmmoš, geas lea deprešuvdna, soaitá maid morránit iđđesija, eaige sus rohtte šat nahkárat. Jus lea menddo váiban, datge soaitá leat deprešuvnna symptoma.

Nahkáriid kvalitehtii sáhttá váikkuhit iešguđetlágan oađđima dikšunmetodaiguin:

1. Ále juga gáfe dmu 16.00 maŋŋá. Alkohola berre garvit guokte diimmu ja duhpáha njeallje diimmu ovdal go manná oađđit.
2. Garvve dmu 18.00 maŋŋá fámolaš losádusa, vaikke lihkadeapmi muđui leage buorrin.
3. Návddaš ovdal go manat oađđit, geahppa biepmu, mas leat čitnahydráhtat.
4. Sihkkarastte, ahte oađđinlatnja lea vuogas, čoasus lágan, seavdnjat ja jaskat ja seaŋga ja gávnnit doarvái vuohkkasat.
5. Mana seŋgii easka dalle, go dovddat váibasiid.
6. Leage seaŋggas dušše dalle, go oađát. Ovdamearkka dihtii gánnáha geahčadit televišuvnna, boradit ja lohkat eará sajis.
7. Jus nahkárat eai rohtte 15–20 minuhtas, mana eret seaŋggas ja máhca easka dalle, go leat váiban.
8. Lihka iđđes álo seammá áigge, beroškeahttá man guhká leat oađđán.
9. Garvve oađđimis beaivenahkáriid.

Jus lihkada juoba vehá vahkus, dat buktá buori miela ja eastada ja dikšu deprešuvnna.

Smiehta, leatgo dus ovdal leamaš muhtin lihkadanvuogit, maidda don leat liikon ja maid sáhtášit álggahit ođđasit? Leago mii nu, maid leat háliidan geahččališgoahtit, muhto áigi ja veadju eai leat reahkkán?

Jus du leat goas nu rávven, ahte ávkašuvvan dihtii, ferte lihkadit unnimustá 45 minuhta hávális, hástte boares jáhkuidat. Juobe moadde oanehis vázzintuvrra vahkus lea buoret go ii mihkkige. Smávva áššiin lea vuogas álggahit.

Dearvvašlaš eallinvuogit hábmejit buori vuođu árgahálddašeami ja buresveadjima lasiheapmái.

1. Bora jeavddalaččat.
2. Čuovo dearvvašlaš borramušvuogi: muttágit šattuid, murjjiid, heđemiid, proteiinna ja čitnahydráhtaid.
3. Geavat gárrenávdnasiid nu uhcán go vejolaš.

Veajuiduvvama ovddida, go doallá oktavuođa skihpáriidda ja lagašolbmuide. Jus báhcá ruoktot ja sierastallagoahtá eará olbmuin, dat geahnohuhttá veaju.

• Doala oktavuođa oahppásiidda, ja váldde oktavuođa ođđa olbmuide.
• Bivdde veahki ja muitali jurdagiinnát ja dovdduinat. Ále báze áššiidatguin okto.
• Oza veardásašdoarjaga ovdamearkka dihtii iežat báikegotti veardásašdoarjjajoavkkuin.