Iešdikšunprográmma

Deprešuvdna sáhttá dagahit, ahte olmmoš geavaha eanet gárrenávdnasiid. Maiddái gárrenávdnasiid geavaheapmi dagaha bahás miela ja doalaha deprešuvnna. Jus geavaha ollu alkohola, dat soaitá maid dagahit deprešuvnna.

Mat leat alkohola čuolmmalaš geavahusa dovdomearkkat?

Alkohola hehttehusat oidnogohtet čielgasit, go alkoholageavahus lassána. Vulobeallái leat čohkkejuvvon čuolmmalaš alkoholageavahusa árra dovdomearkkat.

Loga čuovvovaš jearaldagaid. Vástit daidda geahččamiin maŋimuš gollan golbma mánotbaji. Leage rehálaš alccesat.

1. Leatgo iđđes lihkadettiinat fuomášan, ahte it nagot muitit muhtin áššiid, maid leat dahkan ikte gárrenoaivvis?
2. Leatgo riidalan lagaš olbmuiguin du juhkama birra?
3. Leatgo áican iežat gieđaid doarggistit ievttá juhkama maŋŋel?
4. Leatgo dovdan sivalašvuođa iežat juhkama dihtii?
5. Leatgo čuovvovaš beaivve heahpanan dan, mot leat gárrenoaivvis láhtten?
6. Leatgo máŋgii maŋŋonan dahje leago du bargu muđui gillán du alkoholageavahusa dihtii?
7. Leatgo jugistan juo iđđes go leat lihkkan, vai sáhtát ráfáidahttit iežat nearvvaid dahje buoridan dihtii gomáid?
8. Leatgo goassige dovdan, ahte it nagot heaitit?
9. Divššutgo alkoholain váivves dovdduidat dahje streassa?
10. Leatgo eahpidan, ahte šaddagoađát sorjavažžan alkoholas?

Jus vástidit juoba ovtta gažaldahkii juo, de gánnáha bisánit suokkardallat iežat alkoholageavahusa. Berrešiigo dan geahpedit? Mađi eanet gažaldahkii vástidit juo, dađi dehálabbo dus lea nuppástuhttit iežat juhkanvieruid.

Vaikke du symptomat livčče vel láivvit, gánnáha goittotge suokkardallat iežat alkoholaaddosiid meari. Mannágo riskarádjá badjel nu, ahte dearvvašvuođahehttehusat livčče vuordimis?

Dearvvašvuođahehttehusat ovdánit dávjá hihtásit eaige dihtto vealttakeahttá ovdal go vahát lea juo geavvan.